Nunatsinni amerlanerusut politiitut ilinniarnissaat kissaatigineqarpoq, taamaattumik nunatsinni politiinngorniarfik soqutigineqarnerulerusulluni, aamma amerlanerusunik ilinniartoqalernissaq siunertaralugu, iliuuseqarniarpoq.
Politiinngorniarfik plakaatit, naqitat, aviisini takoqqusaarutit, radio tv-lu atorlugit nunarput tamakkerlugu paasisitsiniaaniarpoq. Matumani siunertaavoq ilinnialerumasut ima amerlatigissasut, politiinngornianik aasaru aallartittoqarsinnaassalluni.
Politiit neriuutigaat, paasisitsiniaaneq inuusuttunit 20-t sinnerlugit ukiulinnit, utoqqaanerulaartunillu allanik inuussutissarsiutilinnit, allanillu ilinniarsimasunit, soqutigineqarluarumaartoq.
Politiinngorniaraanni qinnuteqarfissaq kingulleq tassaavoq februaarip ulluisa 15-iat 2007. Ilinniartunngorsinnaassagaannili assigiinngitsunik piumasaqaatitaqarpoq, peqqissuunissaq pinerluuteqarsimannginnissarlu soorlu ilaatigut piumasarineqarlutik.