Politiit annassimasinnaasunik nassaarnissartik ilimagiunnaaraat

Norgemi Gjerdrumimi illoqarfimmi Askimi nunap sisoornerani annassimasinnaasunik nassaarnissaq ilimanarunnaarpoq.

Norgemi politiit taama ilisimatitsisut, aviisi VG allappoq.

Inuit arfineq-marluk nunap sisoornerani ajunaarsimasut maannamut nassaarineqarput, pingasullu suli maqaasineqarlutik. Annassimasinnaasunilli nassaartoqarnissaa ilimanarunnaartoq, poltiit oqarput.

- Sumiiffiit ilimanaateqarfiusutut nalilikkavut ujarlerfigigaluarpavut. Pisinnaasarput tamaat iliuuseqaraluarpugut, politimesteri Ida Melbo Øystese oqarpoq.

AAMMA ATUARUK Norgemi nunap sisoornerani ajunaarsimasuni nassaarineqartut arfineq-marluusut

Nuna sapaatip-akunnerata siuliani pingasunngornermi ullaaralaakkut sisoorpoq. Ulloq unnuarlu annaassiniartoqarpoq, annassimasinnaasunik ujarlertoqarluni.

Nunap sisoorfiata nalaani ullumi marlunngornermi sisoortoqaqqimmat annaassiniartartut sulinertik unitsikkallaraluarpaat.

Nuna ullaaq manna sisoormat ajoqusertoqanngilaq, inuilli nunap sisoorfiata nalaanit maanna qimagussortinneqarput.

Illoqarfeeraq Ask Norgep illoqarfiisa pingaarnersaannit Oslomit avannamut kangimut 20 kilometerit missaannik ungasitsigisumiippoq.