Polenimiut nunatsinni sanasut akuersissuteqaratik sulipput

Polenimiut qulingiluat februaarip aallaqqataanilli Nuummi sanasuni Greenland Ground Construction A/S- imi sanasutut sulipput. Nunatsinni sulinissaminnut Nunanit allanit nunasiniartunut allaffeqarfimmit akuersissuteqaratik sulinerat unioqqutitsinerusoq politimesterip tullersortaa Bjørn Bay oqarpoq.

Nunatsinniinnaanngitsoq aammali Scandinaviami sulisartunik amigaateqarfiuvoq, aammalumi tamannarpiaq pissutigalugu Greenland Ground Construction A/S Polenimit sulisussanik tikisitsisariaqarsimavoq, tamannalu iluatsilluartoq sanasut aqutsisuat Jens Nørbæk oqarpoq:

- Inuit suleqatiuminarluinnartuupput. Suliassaminnut akisusaassuseqarluartuullutik sulilluartuupput qujamasuttuullutillu, Jens Nørbæk oqarpoq.

Ajornartorsiulli tassaavoq nunatsinni sulinissaminnut Polinimiut akuersissuteqannginnerat.

Politimesterip tullersortaa Bjørn Bay oqarpoq, nunanit sulisinnaanermut akuersissuteqaqqaarluni aggersuugaanni nunatsinnilu suliniaraanni piumasaqaataasoq, Danmarkimiittumi Nunanit allanit nunasiniartunut allaffeqarfimmi akuersissuteqaqqaarluni aatsaat sulineq aallartinneqarsinnaasoq.

Sanasut ittuat Jens Nørbæk aperaarput sanasut Polinimiut qangali sulisorineqarnersut, akivoq:

-Inuit qulingiluat februaarip aallaqqaataani tikikkamilli sulilerput.

Tikikkamik sulisinnaanermut akuersissummik allagartaqarpat?

- Naamik, Danmarkimi sulisussarsiortartoq aqqutigalugu sulisussarsiaraavut.

Qassit suli sulisinnaanermut allagartaqanngillat?

-Naluara, sulimi Nunanit allanit nunasiniartunut allaffeqarfimmiit akissutisinngillat, Jens Nørbæk oqaluttuarpoq Greenland Ground Construction A/S-imi piginnittoq Leif Ågaard oqarpoq nunanit allaniit sulisussanik tikisitsiniarluni aalajangerami Nuup Kommunianut qinnuteqarsimalluni, taakkulu siorna ukiakkut akuersissummik tunimmanni siunnersuisarfimmik ikiortilerluni Polenimi sulisussarsiorsimalluni, sulisussallu tikereermata aatsaat sulisinnaanermut akuersissummik Nunanit allanit nunasiniartunut allaffeqarfimmut sulisumi sulisinnaanermut akuersissutissaannik qinnuteqarsimallutik.