Polenimiut karsimi qernertumi immiussat saqqummiuppaat
Timmisartumi issimasut 96-it ajunaarput, timmisartoq Ruslandimi illoqarfimmut Smolenskimut putsuarissuugaa minniarsaritilluni nakkarmat.
Karsimi qernertumi oqaloqatigiinnernit immiussani timmisartup nammineerluni kalerrisaarutaa sekuntini 20-ni ima kalerrisaarisoq tusaaneqarsinnaavoq: "Nunamut apulerpugut, qullarsarit, qullarsarit", kisianni sumik pissuteqarnersumik nalusatsinnik timmisartumi aquttut qisuariaateqanngillat.
Tamatuma kinguninnguagut timmisartoq orpimmut apormat assakaallunilu, timmisartumi aquttup aappaa oqaasipiluppaluttoq tusaaneqarsinnaavoq.
Præsidentip timmisartumi aquttunik pinngitsaaliilluni Smolenskimut mitsitsiniarsimasinnaanera Polenimi tusagassiorfinni sammineqartorujussuuvoq, tamannali immiussani uppernarsarneqarani.
Taamaattorli timmisartup nakkarnera minutsinik pingasunik sioqqullugu, timmisartup aquttarfiani kinaagaluarnersoq ima oqaluppaluttoq tusaaneqarsinnaavoq: "Naammaginartutut isiginavianngilara..." kisiannili oqaatsini qanoq naanerai tusaaneqarsinnaanani.
Polenimi naalakkersuisut oqaloqatigiinnerit avammut saqqummiunnissaat aalajangiussimavaat, taamaalilluni timmisartup ajutoorneranut tusatsiakkat eqqunngitsut pinngitsoorneqarniassammata.
