Polenimi ilisinissaq qassiiliortitsivoq

Poleniumiummi amerlaqisut isumaqarput præsidentiusimasoq Polenimi inuit oqaluttuarisaanermi pingaaruteqarnerpaat iliveqarfianni ilineqarnissaminut naleqqutinngitsoq.

Naalagaaffinni pisortat nunanit arlalinninngaanneersut Polenip præsidenterisimasaa Lech Kazcynski nulialu toqoqqammersut ataqqiniarlugit illussaarsuarmi Wawelimi illoqarfimmilu Krakowimiittumi sapaatiuppat katersuutissapput. Tassanerpiaq ilisaanissaat præsidentiusimasup marluliaqataata kissaateqarneratigut pivoq, taamatulli kissateqarnera Polenimiut tamavissuarmik isumaqatiginngilaat.

Tassami Wawelip oqaluffissaarsua Polenimi kunngikkormiut tamarmik iliveqarfigaat, aammattaaq Polenip namminersortunngorniarnerani suliniuteqartut pingaarnerpaat ilaannit, Jozef Pilsudskimit, oqaluffissaarsuup ataani iliveqartumit, taavalu oqaluttuarisaanermi Lech Kazcynski oqaluttuarisaanermi taamatut pingaaruteqartiginani, taama tusarfiit arlallit nalunaarput.

Tassunga ilineqarnissaanik aalajangerneq tuaviuussaavallaarlunilu mianersuuttariaqarpallaartoq, aviisi Gazeta Wyborcza pingaarnerutitamini taama allappoq.

Ullup unnuallu ingerlanerinnaanni Polenimiut 26.000-it missaanniittut Facebookikkut akerliuniarnertik takutereerpaat, ippassarlu unnukkut akerliussutsimik takutitsisut arlalinnik 100-likkuutaat ilaatigut ima allassimasunik allagartarsualisaarlutik, ilumut kunngisut ataqqinassuseqarsoraasiuk?

Isornartorsiuisartut isumaqarput præsidentiusimasoq illoqarfiit pingaarnersaanni Warszawami ilineqarpat tamanna naleqqunnerussagaluartoq, DR taama tusagassiivoq.