Polen islandimut 1 mia. koruuninik atukkiivoq
Islandip aningaasakilliorneranik nalimmassaanermut Polen tapersiiniarluni nalunaarpoq. Aningaasat 200 mio. dollarsit, koruuninngorlugit 1 mia. koruunit Islandimut atukkiunneqassasut Polenimi aningaasaqarnermut Ministeriaqarfimmi oqaaseqartartumit uppernarsarneqarpoq.
Allattoq Louise M. Kleemann
novembarip 07-at 2008 10:37
Polen taamaalilluni Tuluit Nunaat, Holland nunallu Skandinaviamiittut peqatigalugit Nunat tamat aningaasaateqarfiat (International Valutafond) suleqatigalugu Islandimut 6 mia. dollarsinik, koruuninngorlugit 25 mia. koruuninik atukkinissaa naatsorsuutigineqalerpoq.
Savalimmiut aamma 300 mio. koruuninik Islandimut atukkiipput, Kalaallit Nunaanni aningaasaqarnermut naalakkersuisoq Per Berthelsen Atuagagdliutini sapaatip akunnera kingulleq saqqummersumi oqaaseqarpoq nammineq aammattaaq inuttut kissaatigigini Kalaallit Nunaat nunamik sanilerisaminik aningaasatigut tapersiinissamik periarfissaqassasoq.
