Polen akitsorterpoq
Illersoqatigiit NATO-mi ilaasortat, qaartartunut ungasissumut igeriuttakkanut illersorneqarnissaannik USA-p suliniuteqarnera Polenimit akornusersorneqarpoq. USA illersornissamut tunngasunik Polenimiititaqarniaruni akiliinerusariaqartoq Polenimit piumasarineqarpoq.
Allattoq Louise M. Kleemann
maajip 08-at 2008 07:54
Qaartartunut ungasissumut igeriuttakkanut illersuutit Tjekkiami Polenimilu inissinneqarnissaat pilersaarutaavoq.
Polen pilersaarummut isumaqataavoq, Polenilli illersornissamut nutarterinissaanut USA 10 milliardit dollarsit nalinginut akiliisinnaappat akuersaarusulluni.
Taamaammat USA-p Polenimi inissiinissaminut pilersaarutini unitsillugit nunami allami inissiinissani eqqarsaatigilersimagaa, Amerikamiut nutaarsiassaqartitsiviat International Herald Tribune allappoq.
Soorlu Iran qaartartumik ungasissumut igeriuttakkamik igeriussigaluarpat, illersuut atorniarneqarpoq.
Amerikamiut inatsisartui Polenip illersornissamut atugassaanik 20 miliuunit dollarsinik immikkoortitsipput, Polenimiut piumasaqaataannit ikinnerungaatsiartunik.
