Polen aamma Tuluit Nunaat sammineqarput

Tyskit EU-mi siulittaasuutitaqartut, Angela Merkel siuttuliullugu, Bruxelles-imi EU-mi qullersat ataatsimiinneranni Poleni pillugu ajornartorsiutit unnuap ingerlanerani ullaap tungaanilu iliuuseqarfiginiarsaraat.

Naalagaaffiit qullersaasa ulloqeqqasioreerneranni tuluit tulliullugit oqaloqatigineqassapput, tamannalu ajornakusoornerussasoq oqaatigineqarpoq.

Tulliullugu ajornartorsiutaalersussaq tassaavoq Tuluit Nunaat. Tassa tuluit tusagassiorfiisa Tony Blair sammisorujussuummassuk, tassami sapaatip akunnerata tulliani Blair ministeriunertut tunuaruni atorfik parteeqatiminut Gordon Brownimut tunniuttussaammagu. Maanna EU-mi qullersat ataatsimiinneranni Tuluit soqutigisaat minnerulersinneqarpata, ukiut marluk qaangiuppata qinersisoqalerpat Tony Blair Konservativinit Tuluit soqutigisaannik illersuisimannginnerarlugu pisuutitaariaannaavoq taamalu tamanna Gordon Brownip ajorsartitaaneranik kinguneqariaannaalluni.

Taamaattumik ataatsimiinnermi matumani pingaaruteqarluinnarpoq Tuluit pisinnaatitaaffiisa EU-mit minnerulersinneqannginnissaat.