Polaroilip nuunneqarnissaa assortuussutaalissaaq

Siumumi ilaasortat ilaasa nuussiniarneq isumaqatiginngilaat.

KNI-mi siulersuisut Polaroilip allaffeqarfiata, aqqanilinnik sulisoqartup, Sisimiuni KNI-p qullersaqarfianut nuunnissaa oktobarip aallartinnerani aalajangiuppaat. Radioaviisimiit paasisavut malillugit nuussinissaq 2008-mi aasaanerani sulinngiffeqarneq iluatsillugu pisussaavoq. Maannakkulli politikkikkut aalassassimaarutaalinnguatsiarpoq, Siumummi politikkikkut oqaaseqartartua, Lars-Emil Johansen naalakkersuisut siulittaasuannut Hans Enoksenimut nuussiniarnermut akerlioqqusilluni allagaqarpoq. Maniitsumilu Siumup immikkoortortaani siulittaasoq Karl Lyberth, Polaroilip Maniitsumiiginnarluni privatinut tunineqarnissaanik siunnersuuteqarpoq.

Suliffiup nuunneqarneratigut sulisut sulilluarlutik ingerlatsilluartut avissaartinneqarnissaat Karl Lyberthimit tulluartuusorineqanngilaq.

Polaroilip, uuliamik pisisarlunilu tuniniaasartup ingerlalluarneranut takussutissat ilagaat, Nunatsinni uuliap akiata nunarsuarmi uuliap akianit appasinnerunera.

KNI-mi pisortaq, Søren Lennert Mortensen oqarpoq Polaroilip allaffeqarfiata nuunneratigut 1 million koruuninik sipaarsinnaallutik.

- KNI-p qullersaqarfiani suliat ingerlanneqareersut atorluarnerisigut, Polaroilip ingerlannerani inuit marluk aningaasarsiaqartinneri ineqarnernullu aningaasartuutit sipaarsinnaavagut, KNI-p allaffissornikkut pisortaa Søren Lennert Mortensen oqarpoq.

Polaroil ukiumut 1 milliard koruunit pallillugit kaaviiaartitsisarpoq.