Polaroilip German Tanker Shipping isumaqatigiissuteqarfigigaa
KNI A/S-ip ikummatissanik pilersuivia Polaroil aamma German Tanker Shipping ikummatissanik imerpalasunik imarpikkoortumik Nunatsinnut assartuinermut tunngatillugu nutaamik isumaqatigiissusiorput.
Assartuinissamik isumaqatigiissut nutaaq ukiuni tulliuttuni tallimani, 2017-imit 2021 ilanngullugu, atuutissaaq.
Isumaqatigiissut Københavnimi marlunngormat pisortatigoortumik atsioqatigiissutigineqarpoq.
- German Tanker Shippingimik suleqateqalernissarput qilanaaraarput, qularinngilarpullu assartuineq isumannaatsumik ingerlakkumaaraat, taamaasillutik nuna tamaat pilersussallugu, Polaroilip pisortaa Tage Lindegaard taama oqarpoq.
Nunatsinnut orsussanik imerpalasunik ukiumut sisamariarluni arfinileriarluniluunniit assartuisoqartarpoq, tamannalu aningaasatigut avatangiisinullu tunngatillugu isumannaatsumik ingerlanneqartussaasarpoq.
German Tanker Shipping sikusiutinik isklasse 1A-nik assigiinnik sisamanik umiarsuaateqarpoq pajunnermilu ataatsimi ikummatissaq 45.000 m3 usigisinnaallugu.
Ikummatissaq imerpalasoq avataanit eqqunneqartoq pingaartumik Kangerluarsorutsimi Nuummilu uninngatinneqartarpoq, aammali Sisimiuni ikummatissaasivik ikummatissanik imerpalasunik eqqussukkanik uninngatitsivigineqarsinnaavoq. Tamakku saniatigut ukiumut ataasiarluni Kangerlussuaq ikummatissanik imerpalasunik pajunneqartarpoq, Polaoilip pisortaa Tage Lindegaard tusagassiorfinnut nalunaarummi taama oqarpoq.
