Polar Circle Marathonimi nunatsinneersut angusarissaarput
- Ingerlalluaqaagut. Ajugaasut angutini pingasut nassaarineqareerput. Angutini Spaniamiu Eduardo Rodriques Tenes siulliuvoq, Niels Berthelsen, Kalaallit Nunaanneersoq normu 2-jusoq. 3-juvoq Jan Petersen, Danmarkimeersoq.
Arnani ajugaasuuvoq Britt Folkermann, Kalaallit Nunaat, 2-julluni Britta Karlsson, Danmarkimeersoq, Hollandimeersoq Babette Van Aalten 3-julluni.
1/2 marathonertuni angutini Connor McLaughlin, Irlandimeersoq ajugaavoq arnani Ragnhild Audestad, Norgemeersoq ajugaasuusoq, taama Nini Biilmann, Greenland Tourismimit suleqataallunilu arpaqataasoq ilisimatitsivoq.
Kangerlussuarmi marathonertut arpannermik aallartinnerani ilungersulaavissimapput, unnuarmi nittaassimanerata kingunerisaanik seeqqutik tikillugit 5 kilometerinut siullernut arpannerminni maakkartariaqarsimapput, pingaartumik sermikkoornerminni nukillaassutigeqisaminnik.
- Taamaakkaluartoq apuussortut assut nuannaarput. Seqinneqaaq, aqqutaa aaqqissuunneqarneralu ajunngeqalutik. Nunat 14-it peqataasui ataqatigeeqaat, apuussornerminni ersaattaanneqartaqalutik pilluaqqusaqattaallutik eqitaartarlutillu. Peqataasut tamarmik ajoratik apuunnertik tulluusimaarutigeqaat, Nini Biilmann Kangerlussuarmit ilisimatitsivoq.
Polar Circle Marathonerneq 42,1 kilometerimut arpanneruvoq. Kangerlussuarmi tullianik marathonernissaq aappaagu oktobarip ulluisa 24-ianni pissasoq pilersaarutaavoq.
