GM-finaali Pokali Nuummukassaaq

Pissartanngorniutivinneq arfininngornermi naammassippat pokali Nuummukassaaq. B-67-illu IT-79-lluunniit angerlaatissaneraa apeqqutaaginnarpoq.

Isikkammik arsaalluni pissartanngorniuunnermi IT-79 aallartilluarpallaarnikuunngilaq, tassami puljami ataasiaq ajugaapput, naligiillutik ajorsarlutillu. Taamaakkaluartoq qunugisaqartuunatik takutereerpaat, kinguarsimagaluarlutillu uteqqissinnaanertik aamma takutereerlugu. Kugsammut N-48-mullu taamaaliorput, 3-1-imik kinguaraluarlutik sukataarnikkut upperinikkullu angummattarlutik. 

Klubbit imminnut ilisarisimalluartut finaalimi inummissapput. Pissartanngorniuunnermi matumani unammereerput, tassani B-67 101-imik ajugaalluni. 

Tamannali IT-79 puigoreerpaat unamminermi pereerpoq nutaarlu utaqqivoq. IT-79-imi sungiusaasuullunilu unammisartoq Kaassannguaq Zeeb piareeqqanertik oqaatigaa. 

- Isinginnaartut naattorsuutingissavaat unamminerup naanissaanut sukataassasugut tunniutiinnarnatalu akiuunniarpungut, Kaassa KNR-imut oqarpoq.

Bronzinnanniuunneq pissanganassaaq

Qularnanngitsumik G-44 Qeqertarsuarmeersoq aamma N-48 Ilulissaneersoq pissartanngorniutivinnermut anngunnissaq siunniunnikuugaluarpaat. Nuummiulli klubbii ukioq manna pitsaalluinnartut paasinarsivoq. Taammaammat Qeqertarsuarmiut Iluliarmiullu bronzinnanniuunneq naammagiinnartariaqarpaat. 

IT-79 B-67-ilu pissartanngorniutivinnerat KNR-TV-mi nal. 15.00 takutinneqassapput. Taannali sioqqullugu G-44 N-48 bronzinnanniuunnerat nal. 13.00 takutinneqassalluni.