Platinimik aatsitassarsiorferujussuarmik isumaqatigiissuteqartoq

Aatsitassarsioqatigiiffik Nunaminerals saffiugassamik platinimik nunarsuarmi tunissasiortut annersaasa tullianik Impala Platinum Holdings Limitedimik suleqatigiinnissamik isumaqatigiissuteqarpoq.
Allattoq Jaaku Lyberth
januaarip 15-at 2008 14:10

Isumaqatigiissut 30 millioni koruuninik naleqarpoq, aatsitassarsioqatigiiffimmillu angisuumik isumaqatigiissuteqarneq iluaqutitaqarpoq.

Nunarsuarmi platinisiortut annersaasa tullia isumaqatigiissusiorfigineqarput, annertuumillu platininut tunngasunik ilisimasaqarlutik, Ole Christiansen Nunamineralsimi pisortaq oqarpoq.

Mississuinerni atugassanik annertuumik aningaasaateqarput. Aatsitassarsiorfimmik angisuumik isumaqatigiissuteqarnerup kingunerivaa, aatsitassamik platinmik misissuinerup aallartinneraniit naammassineqarnissaata tungaanut ingerlanneqarsinnaammat, Ole Christiansen oqarpoq.

Misissuiffigineqartussaq 124 kvadratkilometerinik annertussuseqarpoq. Ole Christiansen Nunamineralsimi pisortaq oqarpoq, Impalamik isumaqtigiissuteqarnerup iluaqutigissagaa, aatsitasssarsioqatigiiffik Impala platinimik misissuinermik piiaanermillu misilittagaqarluarmat.

Platinimik misissuineq ukiunik sisamanik sivissusseqassangatinneqarpoq.

Nuup avannamut akiata Niaqunngunallu akornanni aatsitassamik platinimik misissuineq ingerlanneqassaaq. NunaMinerals misissuinini aallartereerpaa, isumaqatigiissuteqarnerullu kingorna Impala suleqatigineqalerluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq