Plastikkipiluunersuit suli tissukarput

Ruujorerujussuaq plastikkeq qernertoq Kulusuup Tasiilallu akornanni tissukartoq politiinit illersornissamullu qullersaqarfimmit pingasunngormat mianersoqqussutigineqartoq suli tissukarusaartuarsinnarpoq.

Ataasiinnaanngilarli.

Tasiilami politiit ittuat Kristian Sinngertaat oqarpoq, ruujorerujussuaq plastikki alla Sermiligaap eqqaaniittoq.

- Maanna paasivarput, plastikkersuit ruujorit marluk Tasiilap eqqaani sarfarsiataartut. Tasiilap eqqaani umiatsiamik angalasut mianersoqquai. Plastikkerujussuillugooq ruujorit 100 meterisut takitigipput 95 centimeterisullu silitsigalutik.

Plastikkersuup aappaa pingasunngormat paasineqarmat, illersornissamut qullersaqarfiup umiarsuaq Hvidbjørnen plastikkerujussuarmik peersiartortussatut aallartikkaluarpaa. Hvidbjørn utertinneqarpoq, nalilerneqarmat Tasiilami innuttaasunit peerneqarnissaat isumagineqassasoq.

Tasiilami politiit ittuat maanna Nuummiippoq, aatsaallu pingasunngorpat Tasiilamut uteqqittussaavoq, politiit ittuat uterpat plastikkersuit ruujorit qanoq pineqarnissaat aalajangiivigineqassaaq.