Plastikinik mingutsitsineq Sermersuarmut annguttarpoq
Tuluit ilisimatuut, Chukotkami, Kalaallit Nunaanni Svalbardimilu sisamariarlutik sermimi 2005-ip 2010-llu akornanni qillerinermikkut paasisimammassuk sermeq assorsuaq plastikimik akoqartoq, taama nalunaaruteqartuupput.
Ilisimatuut Dartmouth College-meersut aamma University of Plymouthimeersut paasisatik saqqummersittakkami Earth Future-mi tamanut takusassiarisimavaat.
Ilisimatuut aquttuat Rachel Obbard apersorneqarluni Science Magazine-imi oqarpoq, ilisimatuut taamaallaat plastikkit qalipaatigissaartut kisissimagaat, imaassinnaasorlu plastikkit akimmut ersittut, qaqortut sioqqatullu qalipaatillit kisitsinermi ilanngunneqarsimanngitsut, taamaalillunilu sermimiittut suli amerlanerujussuusinnaasut.
Plastikkit qalipaatigissut misissorneqarsimasut tassaapput cellulosefibre-ninngaanneersut, tamakku atisani, tarngutini, cigaretini nangernilu akugineqartarput.
Plastikkit mikisuaqqat, mikroplastikkit imarmi uumassusilinnut qanoq sunniuteqartarnersut suli erseqqissumik ilisimaneqanngilaq, Danmarkilli imartaani misissuinerit nutaarluinnaat takutippaat, ammassassuit pisaasut pingajussaat tamarmik aqajaqquminni centimeterip affaa tikillugu takissusilinnik plastikkitaqartartut.
Ilisimatuut allat Nordsømi Østersømilu misissuisimasut assingusunik nassaartarsimapput soorlu uilluni, saarullinni avaleraasartuunilu.
Aammattaaq timmissat imarmiut aqajaqquini plastikkinik nassaartoqartarpoq, tamannalu ilisimatuut aarleqqutigigaat, Ingenørip nittartagaani oqaluttuarineqarpoq.
Plastikkimik imaani mingutitsineq World Economic Forumip uumasut nerisareqatigiinnerannut inuillu peqqissusaannut ulorianartorsiortitsisutut tikkuarsimavaat.