Nalunaarusiaq: Plastikimerngit mikisuararsuit imermiittut ernummatigisariaqanngillat
Ernumarujussuartariaqanngilaq.
Naalagaaffiit Peqatigiit peqqinnissakkut suleqatigiiffiannit WHO-mit nalunarusiami nutaami plastikimerngit mikisuararsuit nunarsuatta ernganut akuliussimasut pillugit misissuinermi inerniliunneqartumi taama allassimavoq.
Plastikimerngit mikisuararsuit annertunersaat nerisanut akuullutik iineqaartut aqajaroq aqqusaareerlugu aneqqittarput, nalunaarusiami allassimavoq.
Plastikimerngit mikisuararsuit inunnut sunniutaannik misissuinerit annikikkaluarlutik amerliartortut Naalagaaffiit Peqatigiinni sullissiviata nalunaarusiornermut atugassamik katersorniarsimavai.
- Mianersoqqusilluta kalerrisaarinngilagut, Naalagaaffiit Peqatigiit peqqinnissakkut suleqatigiiffianni imeq pillugu immikkut ilisimasalik nalunaarusiap saqqummiutinnginnerani tusagassiortunik katersortitsinermi oqarpoq.
Naarlunnermik toqquteqartut
Isumannaannissamut annikitsuinnarmik uloriaanateqarnera pissutigalu Naalagaaffiit Peqatigiit peqqinnissakkut suleqatigiiffiata innersuutigaa imermik passussinerit nappaatit siaruaatinnginnissaannik anguniagaqartut nunani assigiiinngitsuni aningasaliiffiginissaat plastikimerngit mikisuararsuit ernummatiginerinit ukkatarineqarnerusariaqartut.
Imeq imissallugu naleqqutinngitsoq naarlunnermik kinguneqarluni inunnit ukiut tamaasa 500.000-ngajannit toqqutigineqartartoq Naalagaaffiit Peqatigiit peqqinnissakkut suleqatigiiffiata naleqqiussassatut tikkuarpaa.
Ilutigalugulu missingerneqarpoq nunarsuarmi tamarmi inuit milliardit marluk imeq annamit mingutsinneqarsimasoq imigarisaraat.
Taamaakkaluartoq atuisartut naalakkersuisullu avatangiisit eqqarsaatigalugit plastimik annikillisaaneq anguniarlugu sapinngisamik suliniuteqaqqullugit Naalagaaffiit Peqatigiit peqqinnissakkut suleqatigiiffiata kaammattorpai.
