Plastic not so fantastic: Tupannartorujussuuvoq!
- Tupannartorujussuuvoq. Suli ullumikkumut upperiuminaatsippara.
Giiti Tittussen nunatsinni suliniaqatigiiffik Plastic not so fantasticimeersoq taama oqarpoq, suliniaqatigiiffillu Plastic not so fantastic Nunat Avannarliit Avatangiisinut nersornaasiuttagaannik nersornaaserneqartussatut innersuunneqaqqammerpoq.
Nunat Avannarliit nersornaasiuttagaat Nunani Avannarlerni suliniaqatigiiffiit piujuartitsineq tunngavigalugu siunissami sulinuteqarnerusalernissaat siunertaralugu torrallataanerpaanik sunniuteqarnerpaanillu sulinutinillit nersornaaserneqartarput.
Facebookilu aqqutigalugu suliniaqatigiiffimmik Plastic not so fantasticimik ukioq manna januaarip aappaani pilersitsisut suliniaqatigiiffiup nersornaaserneqartussatut innersuunneqarnissaanik ilimasussimanngilluinnarsimapput. Suliniaqatigiiffik taanna 3947-nik maanna ilaasortaqarpoq, inuillu ingammik plastikkimik atuinerup akiornissaanut iluaqutaasinnaasunik siunnersuuteqartarnissaat siunertaralugu pilersinneqarpoq.
Tassami plastikkimik ulluinnarni atuikinnerunermut siunnersuineq suliniaqatigiffiimmit ukkanneqarpoq.
- Aatsaat uppernarsiartulerpara, ilimagisimanngiivipparali ukiup ataatsip ingerlanerani taama sukkatigisumik taamallu annertutigisunik angusaqassalluta, Giiti Tittussen suliniaqatigiiffiup Facebookianik aqutsisooqataasoq oqarpoq.
Atisat nerisassallu aamma mingutsitsisarput
Suliniaqatafigiimmik pilersitsisut Brugseni suleqatigalugu katersinissamut pilersaarusiuleruttorput. Katersinissamut suliniut illoqarfinni Brugseneqartuni tamani ingerlanneqassaaq.
- Suleqatiserinnillutik suliniaqatigiiffitsinnut saaffiginnittartut amerlareeqimmata suliniutissatta tullia sumut attuumassuteqassanersoq pissanngatigisorujussuuarput, Giiti Tittussen oqarpoq.
AAMMA ATUARUK Plastic Not So Fantastic nersornaasigassatut innersuunneqartoq
Suliniutaali plastikkimik atuinerup annikinnerpaaffissaaniitinnissaanut taamaallaat attuumassuteqanngilaq.
- Atisavut nerisassavullu pinngortitamik mingutsitseqataalluinnartartut aamma ilagaat. Taamaattumik ukkatavut nunatsinni plastikkimik mingutsitsinermut atuinermullu attuumassuteqaannaratik inooriaatsitsinnut aamma attuumassuteqarnerat erseqqissaatigiuaannarparput, Plastic not so fantasticimeersut oqarput.
Greta Thunberg nersornaaserneqartussatut aamma innersuunneqartoq
Nunatsinnili suliniaqatigiiffik nersornaaserneqartussatut innersuunneqartoq unammillertissaqarpoq - svenskeq Greta Thunberg silap pissusiata allanngoriartorneranut tunngasumik - ilaatigut atuanngitsoortarnermigut - suliniuteqarnerminut innersuunneqarsimasoq unammillertissarisaata ilagaat.
Greta Thunberg nunarsuarmi inuusuttuaqqani sunniuteqarluarnerpaat ilaattut Time Magazinemit siorna toqqagaavoq.
Nunat Avannarliit Avatangiisit pillugit ukioq manna 25-ssaanik nersornaasiissapput. Taassuminnga 350.000 koruuninik aningaasartaqartumik nersornaaserneqartussat oktobarip ulluisa 29-anni toqqarneqassapput.
Suliniaqatigiiffik nersornaaserneqassappat Nunat Avannarliit nunatsinneersunut Avatangiisit pillugit ukiut aapperlugit nersornaasiissapput. Attormiummi pinngortitami isumalluutit pillugit siunnersuisartoqatigiit siorna nersornaaserneqarput.