Piviusup oqaluttuassartaa filmimit pitsaanerunerarpaat

Kalaallit meerartaat pinngitsaalisaallutik Danmarkimukartitat ilaallu kingorna meeqqat angerlarsimaffiannut pisinneqartut pillugu filmiliaq Eksperimentet, filmimik naliliisartunit assigiinngitsunik isummerfigineqarpoq. Ilaasa oqaatigaat oqaluttuaq filmimit pitsaanerusoq.

Qaaginnarsiortoq, arriikuluttoq, nangaakuluttoq, ilusilersorpallaagaq, qanganitsersimasoq nalornerpalaartorlu. Tassapput oqaatsit danskit filminik naliliisartut aviisini ullormut saqqummersartuni atugaat. Filmi Eksperimentet Danmarkimi ippassaq takuteqqaarneqarmat uparuaatit annersaraat, filmi oqaluttuassartavianit pikkunaannerusoq, attortinnannginnerummat.

- Filmi tamaat isiginnaartillugu nuannaralugu misigisimarusunnaraluarput, allaammi attortilluni, soorlu misigissutsit Danmarkip qanga iliuuserisimasaa pillugu kamanneq kanngusunnerlu qaffatsikkusunnaraluarput. Ajoraluartumilli taamaattoqanngilaq, taama Informationimi naliliisartoq allappoq.

Uparuaasoqaannanngilarli, aamma nersualaarisoqarpoq. Børsenimimmi torrallataanerarneqarpoq. Politiken allappoq: filmi eqqarsalersitsivoq, piviusorsiorpaluppoq attortinnarlunilu. Tusagassiortoq namminersortoq Iben Albinus Sabroe allappoq: Filmi pitsaassuseqarpoq pingaaruteqarlunilu.

Kalaaleq filmiliaritittartoq aqqaneq-marlunnik ukiulik Laura Skaarup Jensen aamma nersualaarneqaqaaq.

- Aalborgimi najugalik Laura Skaarup Jensen, aqqaneq-marluinnarnik ukioqaraluarluni tupinnaannartumik torrallaalluni Karen-eeraasaarpoq, pissusilersornermigut oqalunnermigullu, Nordjyske Stiftstidende allappoq.

Allali, B.T.-p naliliisartua sakkortuumik uparuaavoq.

- Qujanaqaarmi kalaaliaqqat inuttaammata.