Piumasani pinngikkaa

Venezuelap præsidentiata Hugo Chávez-ip pissaaneqarnerulerniaraluarnini iluatsinngitsoorpaa. Tassa inatsisit tunngaviusut allanngortinniarsimagaluaramigit pissaaneqarnerulerniassagami.

Amerikami kujallermi nunami uuliaateqarluartumi tassani inuit sapaatiummat taasitinneqarmata tamanna paasinarsivoq. Kisianni itigartitsisut amerlanerussuteqalaaginnartut oqaatigineqarpoq.

Taasisut 50,7 procentiisa Hugo Chávez-ip inatsisinik tunngaviusunik allannguiniarnera akuersaanngilaat, 49,3 procentit Chávez-ip qasseriarluniluunniit præsidentitut qinigassanngortissinnaanissaa pissaaneqarnerulernissaalu akuersaaraluarpaat.

Universitetini ilinniartut inatsisinik tunngaviusunik allanngortitsiniarneq akerliuffigalugu siuttuusimapput, tassami allannguiniarneq kisermaassilluni naalakkersuilernissap tungaanut alloriarnertut isigigamikku.

Taasinerup inernera Venezuelami illuatungiliuttunut aamma ajugaaneruvoq, taakkumi akunnerminni isumaqatigiinngittarnertik pissutigalugu sanngiissimagaluaramik.

Hugo Chávez ukiut qulingiluat matuma siornagut pissaaneq tigugamiulli aatsaat taasisitsinermi ajorsartinneqarpoq. Taasineq oqaaseqarfigigamiuk ”socialisme-p sorsuutiginerata ingerlatiinnarnissaa” oqaatigaa.