Piujuaannartitsinissamut ineriartortitsineq oqaluuserissavaat

- Aatsitassarsiorneq uuliasiornerlu qanoq piujuaannartussanngortinneqarsinnaappat? Tamannalu qanoq anguneqarsinnaava? Birgir Poppel, Issittumi inuuniarnermut atugassarititaasunik misissuisoq isumasioqatigiinnermillu aaqqissuisoq ataatsimiinnermi oqaluuserineqartussat pillugit taama oqarpoq.

- Attaveqatigiinnissami isuma tassaavoq, Kalaallit Nunaat piujuaannartitsinissamut ineriartortitsinermik politikkeqartillugu, inuussutissarsiutit ataasiakkaat piujuaannartitsinissamut iluaqutaasinnaanersut paasissallugu. Anguniakkamik oqariartuuteqassooq, Kalaallit Nunaat ukiut tallimat qaangiuppata qanoq ingerlassava? Ukiut qulit imaluunniit 25-t qaangiuppata suna anguneqarsimassua, Birger Poppel oqarpoq.

Isumasioqatigiinnermi issittumi misilittagarineqartut aallaavigalugit Kalaallit Nunaanni piujuaannartitsilluni ineriartortitsisinnaaneq qanoq anguneqarsinnaanersoq aamma oqallisigineqarumaarpoq.

-  Soorlu makku oqallisiginerini, peqqinnissaq, sillimaniarneq aamma avatigiisit, taava taakkuninnga ilisimasallit saqqummiissassapput. Aamma uuliasiorluni misissuinermi sulisut siunissamilu uuliasiortoqalissappat sulisuujumaartut ataatsimiinnermi saqqummiissapput, Birgir Poppel oqarpoq.

Ataatsimiinnermi Kalaallit Nunaata siunissami inissisimaffissaa, Naalakkersuisut siulittaasuata Kuupik Kleistip oqalugiaatigissamaarpaa.

Norgemi Universitetet i Nordland, arktisk dialogimik aallarniisuupput.

- Kalaallit Nunaanni Ilisimatusarfiup soqutigisaraa taamatut ataatsimiisitsissalluni, pissutigalugu bachelorit aamma kandidatit inuussutissarsiutini sulilertussat ilinniartuutigisarmagit aamma inuiaqatigiit ineriartortut ilisimasaqarfigissallugit soqutigisarimmagu, Birgir Poppel nassuiaavoq.

Isumasioqatigiinnermi innuttaasut soqutiginnittut tikilluaqqusaapput, inissalli killeqarmata peqataarusuttut www.hcahome.com-imut nalunaaqquneqarput.