Pituffimmi saleeqatasimasut: Oqariartuutigisarput uppernarsineqaannarpoq
Tuluit tusagassiorfiat, BBC pisimasut pillugit uppernarsaatinik nassaarsimavoq. Paasissutissat taakkua naapertorlugit qaartartoq siku nakkarfini aatsillugu immamut kivisimavoq, nassaarineqanngisaannarlunilu.
Pituffimmi taamani sulisut qinngornernik ulorianartunik eqqorneqarsimasut peqatigiiffiata paasissutissat 1999-imili pissarsiarigamikkit avammut BBC-tulli suaaruteqarniarsimagaluarlutik, peqatigiffiup siulittaasua, Jens Zinglersen oqarpoq.
Jens Zinglersen timmisartoq nakkarmat qallunaat kalaallillu saliimmata saleeqataasimasoq oqaluttuarpoq, qaartartut pingasut aseqqui nassaarineqarmata amerikamut nassiunneqarsimasut, qaammatillu pingasut qaangiummata aqqartartoq qaartartut sisamaannik ujarlertinneqaraluarsimasoq, nassaartoqarsimanngitsorli.
Jens Zinglersenip neriuutigaa BBC-p maannakkut paasisai aallaavigalugit eqqortumik paasisitsisoqarsinnaaalissasoq, 1968-imili danskit naalagaaffiannit pisimasoq eqqaaneqarusunneq ajortoq eqqartorneqarsinnaalissammat.
