KNAPK Pituffik akunniffissatut ammaanneqartariaqartoq
Pituffik akunniffissatut Avanersuarmiunut ammaanneqartariaqartoq, Kalaallit Nunaanni Aalisartut Piniartullu Kattuffiata KNAPK-p piumasaraa.
Allattoq Inge S. Rasmussen
juulip 10-at 2017 06:51
KNAPK Naalakkersuisunut ammasumik allagaqaateqarpoq, pissutsit ullumikkut atuuttut akueriuminaattutut tassani ilaatigut taaneqarlutik.
- Pituffimmut akunninniaraanni Base Commanderi siumut attavigineqaqqaartussaavoq, umiatsialeqqusaanngillat, pisiniarfiliarniarunillu MP-mik ilaqaqqaarlutik pisiniaqqusaapput. Pissutsit taamaattut KNAPK-mit akueriuminaatseqaavut, KNAPK-p siulittaasua Henrik Sandgreen allappoq.
Silap pissusiata naatsorsoruminaassinnaanera pissutigalugu angalatilluni akunniffissaqarsinnaaneq pisariaqarluinnartoq, taassuma oqaatigaa, Pituffillu matumani akunniffissatut ammaanneqarnissaa kissaatigalugu.
Aaqqiissutissap Nunatta, Danmarkip USA-llu akornanni isumaqatigiissummut ilaatinneqarnissaa KNAPK-p kissaatigaa.
