Pitsaanerusinnaavoq

Atorfinitsitsiniarneq ajorluinnartumik ingerlanneqarnerarlugu danskit ilageeqarnermut ministeriannut Aarhusillu biskoppeqarfiani biskopimut allagaqarsimapput, peqatigisaanillu oqaatigaat tamannarpiaq pillugu ilageeqarnermut ministeriaqarfik siornatigut oqaloqatigereersimallugu.

Taakku Radioaviisimit apersorneqarnerminni palasimik atorfinitsitsiniarnermi atugassarititaasut sakkortuumik isornartorsiorpaat. Juanna Platoup - ilaqutariinni pisut peqqutigalugit atorfittaaminit tunuartariaqartup - palasit Danmarkimit Kalaallit Nunaannut suliartortartut assingalugit nuunnerminnut atatillugu akiliunneqartussaannginnera assigiinngisitsinertut taavaat.

Peqatigisaanillu ilageeqarnermut ministeriaqarfimmut apeqqutigaat palasitaassap Namminersorlutik Oqartussat Danmarkimi palasianik, Jens Kristian Kleistimik, qanoq ililluni suleqateqassanersoq. Tamanna aamma siornatigut ministerimut apeqqutigisimavaat, taamanilu akissutaasoq tassaavoq 'tamanna palasit taakku akunnerminni aaqqitassarivaat'.

- Danmarkimi naalagiarsinnaanissarput taamarsuaq ilungersuutigisariaqanngikkaluarparput, arnat taakku marluk allapput, kalaallillu Danmarkimi najugaqartut siorna aasakkulli Namminersorlutik Oqartussat palasiannik, assersuutigalugu ilisinernut, atuisinnaasimannginnerat innersuussutigalugu.

- Pisut nuanninngitsut ilinniarfiginerisigut piaartumik aaqqiissuteqartoqarnissaa neriuutigaarput. Ilagiinni toqqissimannginneq ukiorpassuarni atuuttoq sivitsorpallaaqaaq, naggasiillutik allapput.

Ilageeqarnermut ministeriaqarfiup KNR-imut oqaatigaa, Aarhusip Biskoppeqarfia aaqqiissutissamik nassaarniarnerani ikiorusullugu.