Pitsaaliuinermut siunnersortit amerlineqartussanngortut
- Pitsaaliuinikkut suliniutit qaffassarneqassasut ilaqutariinnik pisariaqartitsisunik nukittorsaanikkut, ikorfartuinikkut, paasititsiniaanikkut, siunnersuinikkut sammisassaqartitsinikkut, qaamarsaanikkullu pitsaaliuisoqarsinnaasoq, Qaasuitsup Kommuneani Inunnik isumaginninnermut ataatsimiititaliami siulittaasoq, Bendt B. Kristiansen oqarpoq.
Meeqqat angerlarsimaffiup avataanut inissinneqartut ukioq manna 49-nut amerlassusilerneqarput, isumagisassamullu tassunga Qaasuitsup kommunea immikkut 10 millioner koruuninik aningaasaleeqqittariaqarsimavoq.
Meeqqat angerlarsimaffiup avataanut inissinneqartartut ikilisinniarlugit periuseq ”siusinaarluni iliuuseqarneq” suliniutissatut siunniunneqarpoq, tassani meeqqat isumaginnittoqarfimmut nalunaarutigineqarneraniillu ilaqutariinnut piaartumik ikorfartuinermik aallartitsisalernikkut.
Inatsisartuni Ilaqutariinnermut Ataatsimiititaliap, meeqqat inuusuttuaqqallu angerlarsimaffiup avataani inissinneqarsimasut atugaannik nakkutilliinermik naalakkersuisut nukittorsaaqqullugit siunnersuutigilersaarpaa.
Ilanngutassiaq unnugu Qanoruukkut takujuk.
