PISUT: Bruxellesimi peqqarniisaarniarneq pillugu ilisimasavut
Belgiami illoqarfiit pingaarnersaanni, Bruxellesimi, timmisartoqarfissuaq metrollu unittarfia marlunngormat ullaakkut peqqarniisaarnianit qaartartumeerneqarput.
Pisut:
- Bruxellesimi timmisartoqarfissuaq ippassaq marlunngornermi ullaakkut nalunaaqutaq arfineq-pingasunngulersoq qaartartumeerneqarpoq.
- Bruxellesip qeqqani metrop unittarfia Maelbeeb nalunaaqutaq 9.15-ip missaani qaartartumeerneqarpoq.
Paasiniaaaneq:
- Peqqarniisaarniat imminut pilliutigalutik timmisartoqarfissuarmi qaartartumeerisut pingasuusut ilaat ataaseq Belgiami politiit ujaarivaat.
- Peqqarniisaarniat pingasuusut taxarlutik timmisartoqarfiliarsimassangatinneqarput. Taxartitsisoq politiinut oqaluttuarsimavoq angutit pineqartut nassataminnik taxartitsisumit ikioqqusimanngitsut.
- Belgiami naalagaaffiup unnerluussissuata oqaatigaa Belgia tamakkerlugu pakasaalluni misissuisoqartoq.
- Illoqarfiup ilaani Schaerbeekimi misissuisoqarmat politiit qaartartunik, akuutissanik Islamisk Statillu erfalasuanik nassaarsimasut, unnerluussisussaatitaasup ilisimatitsissutigaa.
- Islamisk Stat saassussinermut akisussaasuulluni nalunaaruteqarpoq.
- Ikiligaasut ilaata sakiaani kikiassuit skurellu nassaarineqarput, taamaammat qaartartut kikissanik immerneqarsimasut atorneqarsimassangatinneqarput.
Eqqugaasut:
- Saassussisoqarnerani inuit 34-t toqutaasimanerat ikiligaasullu 250-iunerat uppernarsarneqarpoq. Eqqugaasut amerlassusaat pillugu oqartussaasut ullaaq manna nalunaaruteqaqqinnissaat naatsorsuutigineqarpoq.
- Savalimmiormiu ingasanngitsumik ikiligaasimavoq. Danskisut innuttaassusilinnik allanik ajoqusertoqarsimaneranik nalunaaruteqartoqanngilaq.
- Ikinnerpaamik amerikamiut pingasut, frankrigimiut arfineq-pingasut sverigemiullu pingasut ikiligaapput.
Belgia ullumi pingasunngornermi:
- Timmisartoqarfissuarmi Zaventemi timmisartuussinerit tamaasa ullumikkut taamaatiinnarneqarput.
- Belgiami naalakkersuisut innuttaasunut nalunaarutigaat ullup qeqqanut minutsimi ataatsimi nipaallisimalluni nuna tamakkerlugu eqqaaniaasoqassasoq.
- Aammattaaq illoqarfimmi universiteti ataaseq, Starbucksip sutorniartarfiuta tamarmik, aningaaseriviit arlallit aningaasanillu tigusisarfiit matoqqatinneqarput, aamma bussit qimuttuitsullu ilaat angalatinneqanngillat.
- Marlunngornermi, pingasunngornermi sisamanngornermilu Belgia tamakkerlugu aliasuffiussapput.
Najoqqutarisat: Belga News Agency, Reuters, AFP, The Guardian, La Libre, Ritzau, TT, Le Monde, danskit nunanut allanut ministeqarfiat, VTM, VRT, ABC News
/ritzau/