Pisuinnaq biilinit aporneqartoq: Aqqusernit quasarsinnaanerat politiit mianersoqqussutigaat
Biilinik ingerlatsisoq, pisuinnarlu aporneqartoq kingorna napparsimmaviliaanneqarput. Biilinik ingerlatsisoq ajunngitsoq nalunaarutigineqarpoq, aporneqartulli qanoq-issusia nalunaarutigineqarani.
Imigassartorsimatillunili biilertoqarsimanngitsoq Nuummi Politiit ilisimatitsissutigaat, biilinimmi ingerlatsisoq ajutoornerup kingorna aaversikkami imigassartorsimangitsoq paasinarsivoq.
Aqqusernulli quasarnera ajutoornermut pissutaavoq:
- Biilertut mianersorlutik biilernissaat innersuussutigaarput, pisarnermit kigaannerusariaqarput, biilillu assakaasuisa quasattorsiutilernissaat innersuussutigaarput, Katrine Johnsen, Nuummi Politiini pigaartut ilaat KNR-imut oqarpoq.
Taamatullu ajutoortoqartarnera takornartaanngilaq:
- Aqqusernit quatseruttorneranni taama ajutoortoqartartoq takusarparput, soorlu siallersimagaangat, unnuakkullu qiianarsilaaginnartorlu aqqusernit quatsittarput, Katrine Johnsen Nuup politiivineersoq oqarpoq.
