Pissutsit ernumanavinngillat
Royal Greenlandip Sisimiuni aalisakkanik suliffissuaani sulisut 20-t missaasa ukioq manna soraarsinneqarnissaat, Qeqqata Kommuniani borgmesterip Hermann Berthelsenip ernumanartikkaluarlugu, Royal Greenlandip Sisimiuni suliffiutiminik nutarteriniarnera siunissaq eqqarsaatigalugu isumalluarfigaa:
- Soraarsitaasoqartussaatillugu ernumanartoqartuaannarpoq, pitsanngorsaanissamulli atatillugu Royal Greenlandip kommunalbestyrelsimut nassuiaateqarnermini soraarsitaasussaqarnera soorunami uggoraa, Royal Greenlandilli Sisimiuni siunissami suliffissuarmik ingerlatsiuaannarnissani nutarterinikkut qulakkeersinnaavaa, tamannalu iluarisimaarnarpoq, Hermann Berthelsen oqarpoq.
Qeqqata Kommuniata ukioq mannamut missingersuutaani atuarneqarsinnaavoq 41 millionit koruuninik amigartooruteqartoqarnissaq siunniunneqartoq, sulisullu soraarsitaassappata akileraarutitigut isertitat ikilinissaat ilimagineqarsinnaagaluartoq, assigiinngitsutigut sipaaruteqartoqarnikkut Qeqqata Kommuniani aningaasaqarniarneq ernumanartoqartinngikkini, Hermann Berthelsenip oqaatigaa.
Sulisullu soraarsitaasussat assigiinngitsutigut pikkorissartinneqassammata aamma ernumanartoqartinngilai:
- Suliffissaaruttoq kinaluunniit kommuniminngaanniit isumagineqartussaavoq, kisianni aamma pikkorissarnermikkut illoqarfinni allani suliffissarsiorsinnaasut, Royal Greenlandimit paasitinneqarpugut, Qeqqata Kommuniani borgmesteri Hermann Berthelsen oqarpoq.
