Pissutissaqanngitsumik aarlerisut

Issittup sikuata aakkiartuinnarnerata kingunerisaanik Issittup nanua tammariartuinnassasoq ilisimatuut aarleqqutigaat, tamannali tunngavissaqarunanngilaq.

Ilami nannup alleruisa qangarsuaaneersut Svalbardimi siumorneqartut tamatumunnga takussutissaagunarput.

Alleqqut pineqartut ukiunik 110.000-inik 130.000-illu akornanni pisoqaassuseqassangatinneqarput, siornatigut siumorneqartarsimasunut pisoqaanerungaatsiarlutik.

Taamaassimappat nannut nungukkiartuaarnissaat aarleqqutigineqarsinnaanngitsoq, Olafur Ingolfsson Islandip universitetianeersoq tuluit tv-qarfissuannut BBC-mut oqarpoq.

Nunarsuatta silaa allanngorartuarpoq, kiannerusarlunilu nillernerusarami.

Ukiut 15.000-it qaangiupput kingullermik sermersuaqarfiummat, sulilu kiatsikkaluttuinnarluni. Taamaammat nannut tammaraluttuinnarnissaat aarleqqutigineqarpoq, tunngavissaqanngitsumilli, nannummi sermersuaqarfiunngitsuni uumasinnaasut alleqqut siumorneqartut takutissinnaagunarpaat.