Pissutaasimasinnaasut qulaajaqquai
- Finanstilsyni imaluunniit Finansiel Stabiliteti misissuissanngillat, taakkumi misissuitinneqarpata bankimut attuumassuteqartunit pisoq misissorneqassaaq, taama oqarpoq bankimi siulersuisuusimasut siulittaasorisimasaat.
Siulittaasuusimasup, N.E. Nielsenip siulersuisuusimasunut ilaasortaasimasut misissuisoqarnissaanut tapersersortigai.
Finanstilsynip imaluunniit Finansiel Stabilitetip misissuinissaa, Aningaasarsiornermut Suliffissuaqarnermullu ministerip, Brian Mikkelsenip ippassaq oqaatigaa. Taakkuli kisimik misissuinissaat naammanngitsoq, N.E. Nielsenip oqaatigaa.
- Bankit allat akiliisinnaajunnaartut Finansiel Stabilitetip toqqagaannit misissorneqartarput. Uagut isumaqarpugut taamaaliorneq pissusissamisuunngitsoq. Uagut isumaqarpugut kinaassusersiunngitsunit misissorneqartariaqartoq, N.E. Nielsen Danmarks Radiomut oqarpoq.
Amagerbankip akiliisinnaajunnaarnerata, naalagaaffiup aningaaserivinnut ikiuutissaat pingasuusut ajoqusernavianngikkaat aammalu sillimmasiinermi aningaasanik sinneqartoorfiusut, statsministerip, Lars Løkke Rasmussenip ullumi oqaatigaa.
Amagerbankip nalilersorneqarnerani qanorluunniit inerniliisoqaraluarpat, naalagaaffiup bankinut sillimmasiisimanera iluanaarutaasussaasoq, Lars Løkke Rasmussen aamma oqarpoq.
Aningaasanik atorniarnermut Naalagaaffik 13,5 milliard koruuninik sillimmasiisimavoq, taakkunannga aningaasat 6,7 milliard koruunit annaaneqartussaasut Aningaasaqarnermut ministerip, Claus Hjort Frederiksenip oqaatigaa.
Amagerbankip akiliisinnaajunnaarnerata, Bankinut ikiuutissatut inatsit 2 eqqorneqarpoq, ikiuut taanna aamma taaneqartarpoq Akiitsornermi ikiorsiissut. Tassalu tassani aningaasaatigineqartut ikilerujussuarput taamaattorli suli sinneqartoortussaassalluni.
Bankip akiliisinnaajunnaarneranut atatillugu ataqatigiinnermi aaqqissuusinerup iluani ajutoortoqarsimanersoq statsministerip suli oqaatigisinnaannginnerarpaa. Taassuma misissuinerit inerneri utaqqimaarallarniarlugit aamma oqaatigaa.
