Pissuserissaarneq pillugu innuttaasut ataatsimiitinnialerpaat

Illoqqortoormiuni piniartut qilalugartamik tuugaavi mattaallu ilaannai tigoriarlugit sinnerinik qimatsiinnarsimanerat Aalisarnermut, Piniarnermut Naasorissaanermullu Naalakkersuisoqarfimmiit sakkortuumik avoqqaarineqarpoq. Piniarnermi malittarisassat pissuserisassallu pillugit Illoqortoormiuni innuttaasut maanna ataatsimiisinneqarnialerput.

Allattoq Louise M. Kleemann

aggustip 28-at 2008 13:57

Illoqqortoormiut kommuneat Naalakkersuisoqarfimmeersunit ippassaq ataatsimeeqatigineqarpoq. Ataatsimeeqatigiittullu kattussaminnik tusagassiuutinut nalunaarumminni allapput nerineqarluarsinnaasunik pilattarfimmut qimatsiinnarneq akuerineqarsinnaanngilluinnartoq, piniartullu namminneq atugassatik suliarisinaasatillu sipporlugit pisaqartassanngitsut.

Piniartut 30-it sinnerlugit qilalugaqataasimasut pisortatigoortumik pilaffigisaminnut torersaajartoqquneqarput, inatsisillu naapertorlugit pisamik nalunaarsorneqarnerat kommunemut nassiutissagaat. Naalakkersuisoqarfimmit ilimagineqarpoq sivisuumik taamatut pissuserlunneq ingerlanneqarsimassasoq, piniartullu nassuiaaqquneqarput sooq qilalukkat ilanngatsiaannakkat qimanneqarsimanersut.

Illoqqortoormiuni borgmesterip, Erling Madsenip radioaviisimut utoqqatsissutigigaluarpaa, silarlulernera pissutigalugu piniartut pisatik tamaasa angerlaassinnaasimanngikaat.

Borgmesteri taamani aamma oqarpoq pisimasoq assut ajuusaarnartoq soorunalumi piniartut aamma ajuusaartut, atugassaritinneqartulli ilaatigut taamaassinnaasartut.

Pissuserissaarneq pillugu innuttaasut ataatsimiitinnialerpaat

Aamma atuaruk