Angutit arsaallutik nunatsinni pissartanngorniunnerannut atatillugu ippassaq unamminerni paasinarsipajaarpoq, kikkut semifinalinut ingerlaqqissanersut.
TM-62 Kulusummeersut N-48 Ilulissaneersullu unammimmata naligiipput 1-1-eramik. Eqaluk 54 Nanortaliup pigisaanit Tasiusameersut Kâgssagssuk-mut Maniitsumeersunut 6-2-mik ajugaasut. Taamaalilluni paasinarsivoq Kulusummeersut TM-62 aamma Nagdlúnguaq N-48 Ilulissaneersut pulje 1-imit ingerlaqqissasut.
Pulje 2-miittut unammineranni Kugsak 45 Qasigiannguaneersut B-67-imut Nuummeersunut 1-0-imik ajugaavoq, Nuummeersut taamaalillutik pissartanngorniutivinnernut ingerlaqqinngitsuussapput.
Kissaviarsuk K-33 Qaqortumeersut ippassaq unnukkut Uummannameersunut Malamuk-mut unammimmata inerneraa, Malamullu K-33-imut 2-0-imik ajugaanerat.
Angutit arsaallutik pissartanngunniunneranni holdit pingasut taamaalillutik semifinalinut ingerlaqqissinnaanngussapput.
Ullumi unamminerit nangillugit, Nuup arsaattarfiani ualeru nalunaaqutaq tallimanut unammissapput Kugsak K-33-ilu, tassani pulje 2-mi kikkut ingerlaqqissanersut paasinarsissaaq. Tulliullutik unnugu nalunaaqutaq arfineq-marlunut unammiumaarput Kâgssagssuk N-48-lu, tassani kikkut pulje 1-imi siuttunngussanersut paasinarsiumaarpoq, N-48 imaluunniit tupaallatsitsisut TM-62 Kulusummeersut.
