Pissartanngorniunnerit ataatsinut aallartissapput
Assammik arsarluni arnani angutinilu pissartanngorniunneq Bank Nordik GM 2011, Nuummi Inussivimmi aallartinneqassaaq.
Assammik arsarluni pissartanngorniunneq Assammik arsartartut kattuffiannit GSS-miillu aaqqisuisoralugit Inussivimmi aqagu ataatsinut aallartittussanngorpoq. Angutini holdit arfinillit arnanilu aamma holdit arfinillit unammersuaarnissami peqatassasut GSS-imi aaqqissuisuneersup Rita Egedep oqatigaa.
-Arnani Kâgssagssuk Maniitsumiik, GSS aamma Nûk Nuummiit, SAK sisimiuniit, K-33 Qaqortumiit kiisalu N-48 Ilulissaniit peqataassapput. Kiisalu Angutini SAK amma S-68 Sisimiuniit, N-48 Ilulissaniit, GSS aamma Nûk Nuummiit, kiisalu K-33 Qaqortumiit peqataassaapput, Rita Egede oqarpoq.
Unammersuaarneq marlunngornermi aallartikkuni pingasunngornermi sisamanngornermi tallimanngornermilu unammisaqattaartoqassaaq. Kiisalu arfininngornermi inissinniunnerit ingerlanneqareerpata, sapaammi ajugaaniutivinnerit ingerlanneqassapput.
Ukioq manna unammersuaarnermi ingerlanneqartussami aaqqisuisunik kikkut pissartanngorsinnaanissaat eqqoriaruminaatsinneqarpoq.
-Ukiut kingulliit eqqarsaatigissagaanni arnani GSS aamma Nûk kiisalu SAK ilimanaateqarsinnaapput. K-33 aamma nutaanik arsartortaarsimaguni aamma ilimanarsinnaavoq. Angutillu eqqarsaatigissagaanni tamarmik ilimanaateqarput, taamaattumik unammersuaarnissaq pissanganaqaaq, Rita Egede oqarpoq.
Ilanngullugu aamma oqaatigaa unammersuaarnerit isiginnaarneqarluarlutillu malinnaaffigilluarneqarumaartut.
Assammik arsarluni pissartanngorniunnissaq pillugu radioaviisi sapaatiuppat minutsinik tallimaannarnik sivisussuseqarluni aallakaatinneqassaaq.