Pissarsiffiulluartartoq KNI-miiginnassaaq
Polaroilip KNI-mit avissaartinneqarnissaa Atassutip kissaatigaa, taamaaliornikkut immikkoortortat assigiinngitsut ersarissarneqarnerunissaat qulakkeerumallugu, taamaaliortoqassagunanngilarli.
KNI maannakkutut ingerlatilluni sinneqartooruteqarluni ingerlavoq, tamatumanilu Polaroilip pissarsiulluartarnera pissutaanerpaalluni. Polaroil siorna 73,1 millionit koruuninik sinneqartooruteqarfiuvoq, KNI-llu sinneqartoorutai tamarmiusut 39,6 millionit koruuniullutik. KNI taamaasilluni Polaroileqanngitsuuppat annertuupilussuarmik amigartooruteqassagaluarpoq.
KNI-lli siulersuisui ernumasariaqanngillat. Pissarsiffiulluartartormi avissaartinneqarnavianngilaq.
Naalakkersuisut siunnersuut nalilersuiffigereerlugu avissaartitsinissaq aningaasartuuteqarnerulernermik pilersitsinissaa tikkuarpaat, taamatut pisoqassagaluarpat maannamut naleqqiullugu aaqqissuussaanerit marluk pilersinneqartariaqassammata.
- Tamatuma assersuutigalugu kingunerissavaa siulersuisut marluunissaat, direktørit marluunissaat il.il. tamannalu soorunami akitsorsaataallunilu aningaasartuuteqarnerulissutaassaaq, Naalakkersuisut siulittaasuat Aleqa Hammond taama allappoq.
Aammattaaq avissaartitsineq Pilersuisumut annertuumik kinguneqartitsinissaa tikkuarpaa, aningaaserivinnit aningaasalersorneqarnissaata qulakkeerniarneqarnissaata ajornartorsiutinngorsinnaanera ernumassutigalugu.
- Polaroilip aallaavittut immikkut niuerfittut nukittuumik inissisimanissaa namminerlu pitsaasumik aningaasalersuilersinnaanissaa qularnanngilaq akerlianilli Pilersuisoq immikkut niuerfiulluni unammisassaqassalluni, Hammond taama allappoq, siunnersuutillu itigartinneqarnissaa kaammattuutigalugu.