Pissarsiassaminnik anginerusumik piumasaqarput
Nunavimmi nunaqarfiit, Puvirnituq, Salluit Kangiqsujuarlu Nunavik Nickel Mine-imit pissarsiassaminnik anginerusumik piumasaqarput.
Allattoq Jokum Nielsen
-Tassaavugut annertunerpaamik eqqugaasussat, Kangiqsujuarmi borgmesteri Mary Pirlutuut Nunatsiaq News-imut oqarpoq, oqaluttuaralugulu nunaqarfinni taakkunani inuttaasut sinneqartoorummik avisseqatigiittarnermik isumaqatigiissummik naammaginninngitsut, agguataarinerlu 30-70-tut siunnersuutigalugu, tassa nunaqarfimmiunut iluaqutaasussamik.
Nunavik Nickel Mine aallartisarneqarnermini suliffinnik 300 missaniittunik pilersitsiviussaaq tamassumalu kingornaa aalaakkaasumik 270 missaaniittunik suliffiussalluni.
Aatsitassarsiorfiup pilersikkiartornerani naggueqatitta suleqataanissaannik anguniagaq tassaavoq 80-90 procenti.