Pissakinnerit pissaqarnerillu nikinganerujussuat millisarneqarnialerpoq
Isumalioqatigiissitap Nuummi ataatsimeeqattaarnitik aallarneqqammerpaat. Siulittaasuusup, aningaasarsioneq pillugu professorip, Torben M. Andersenip oqaatigaa, Nunatsinni ajornartorsiutaasut immikkuullarissuteqartut, Nunanilu Avannarlerni atugarissaarnissamut ingerlariaasaat imaaliinnarlugu Nunatsinnut atulersinneqarsinnaanngitsoq unnerlugu.
Ilami Kalaallit Nunaat isorartoorujussuuvoq inunnillu ikittuinnarnit najorneqarluni. Atugarissaarnermili Nunatsinni atugassarititaasut Danmarkimut naleqqiullugu nikinganerujussui aamma maluginiarsimavai, Nunatsinnilu ilaqutariit atugarlunnerusut ajornartorsiortorujussuusut aamma oqaatigalugu.
Siullermik ullumikkut malittarisassat qanoq ittuuneri misissorluassavagut qanoq ittuunerilu paasiniassallutigik.
Tassa inunnik isumaginninnermik allanillu inatsiseqarpoq, taakkulu akileraarutitigut aningaasalersorneqassapput.
Atugarissaarnissarliuna akikitsuinnaanngitsoq. Eqqaamassavarpulli akileraartarnermut tunngassutilinnik isumalioqasigiissitaliaq aamma suliaqartuummat. Tassami qanoq ililluni akileraarutitigut akitsuutitigullu Nunatta karsianut isertitaqarnerusinnaaneq aamma ujartortussaassavaat. Torben M. Andersenip aamma oqaatigaa, uuliamik aatsitassanilluunniit suliffeqarfeqalissagaluarpat atugarissaarnerup ineriartortinneqarneranut sunniuteqarluarsinnaasut. Tamakkuli pitinnagit massakkut akissarisavut toqqammavigalugit pilersaarusiortoqarallartariaqartoq aamma oqaatigaa:
- Massakkorpiaq piareersimariikkanik isummersuuteqanngilagut, tassami suna tamaat ammaffigalutigu suleqqaartussaavugut, sunalu tamaat qaqilertussaassallutigut. Tamatumalu kingorna aatsaat sunik periarfissaqarnersoq isummersuusiorsinnaassalluta, tassa politikkikkut isummerfigineqarsinnaasunik innersuusiortussaassaagut.
Isumalioqatigiissitaq ulapittorujussuusussaavoq, aappagumi maajimi ilaannakuugaluamik isummersuusioreersimasussaapput, februaarimilu 2011-mi tamakkiisumik isummersuusioreersimassapput.
