Pissakilliortut kisimik atuarfinni nerisinneqartassapput
Tommy Marøp taama oqaaseqarnera Inatsisartuni partiinit illuatungiliuttunit qisuariarfigineqarpoq.
- Naalakkersuisunut ilaasortap meeqqat ajornartorsiuteqartut, atuaqataannut nikanarsarlugit
nittarsaassiniarnera paasisinnaanngilluinnarparput. Tamanna “kanngunaqaaq”, Demokraatit siulittaasuat Jens B. Frederiksen oqarpoq.
Meeqqat sorliit akeqanngitsumik nerisinneqartarnissaat, Tommy Marøp qanoq iliorluni nalilersorniarniarnerai Demokraatinit paaserusunneqarpoq.
Naalakkersuisunut ilaasortap Tommy Marøp siunnersuutaa akuersaarneqarsinnaanngitsoq, Naalakkersuisut siulittaasuata akuliuffigissagaa, Demokraatit kajumissaarutigaat.
Tommy Marøp Atuagalliutinut oqaasii, Inuit Ataqatigiinnit aamma tupaallaatigineqarput. Oqaatigalugulu matumani pineqartut ileqqorissaarneq aamma piitsuussuseq tunngavigalugu immikkoortitsinermik akuersaarnertut taallugu. Ilaqutariit atugarissaannginnerusut naalakkersuisunut ilaasortamit taamatut takkorliunniarneqarnerat, toqqissisimananngitsoq IA-mit oqaatigineqarpoq.
Naalakkersuisut meeqqat assigiimmik tamaasa børnecheckimik tunisariarlugit, atuartut nerisinneqartarneranni assigiinngisitsiniarmata, imminut assortuuttumik iliornerusoq, IA isumaqarpoq.