Pissaaneqarniunneq ingerlaannarpoq

- Air Greenlandip timmisartuutaani saqisut ullaap tungaa suliartoqquneqarsimasut saqisut suliaminnik unitsitsinerat, isumaqatigiissutit atuuttut naapertorlugit unioqqutitsinerummat, taama oqarpoq Funktionærforbundip ataani timmisartuni inuttat immikkoortortaqarfiani siulittaasoq Per Fallentin. Air Greenlandilli timmisartuutaani saqisut kaammatuigaluarneq tusaajumanngilaat. Air Greenlandip timmisartuutaani saqisut siulittaasuat, Anders Mark Jensen radioavisimut oqarpoq ilaasortaminut ullaap tungaa erseqqissarsimagini sulinermik unitsitsineq isumaqatigiissutaareersunik unioqqutitsinerummat suliartortariaqartut. –Itigartippaanngali oqarlutik Air Greenlandimi pisortat tusaajumalerpata aatsaat suliatik nangeqqikkumaaritik, taama oqarpoq Air Greenlandip saqisuisa siulittaasuat Anders Mark Jensen. Sermitsiap paasisai kingulliit naapertorlugit saqisut suliartunngikkallarnissartik aalajangiusimappassuk, Air Greenland sulisartut eqqartuussiviannut angussiniarpaluppoq.

Air Greenlandip timmisartuussinernik pilersaarusiortarfiata oqaatigaa Kastrupimiit Narsarsuarmut timmisartuussinissaq pilersaarutaareersutut ingerlanneqarumaartoq saniatigullu Nuummiit Narsarsuarmut utimullu timmisartuussinissaq aamma piumaartoq. Kalaallit Nunaata sinnerani ullumi timmisartuussinissat kiisalu Kastrupimiit Kangerlussuarmut timmisartuussinissaq unitsiinnarneqarput.

Air Greenlandip timmisartuutaani saqisut ippassaq marlunngornerup ullaavani unitsitsimmatali Kalaallit Nunaata sineriaani angalasussat 750-t missaaniittut nikinnaveeqqapput.

timmisartuussinissat pillugit erseqqinnerusumik paasisaqarusuttut alakkartsinnaavaat Air Greenlandip nittargaa: www.airgreenland.gl