Pisortat illuutaat
Attartortumiit piginnittuunermut aaqqissuussineq malillugu Namminersornerullutik Oqartussat pisortat illuutaannik tunisisimanerannut tunngatillugu nalunaarummi eqqartuussissuserisoq Poul Schmith, Naalagaaffiup eqqartuussissuserisuatut, kammeradvokatitut taakkartorneqarpoq. Tamannalu pillugu Namminersornerullutik Oqartussat pisortaannut, Kaj Kleistimut erseqqissartipparput.
Kaj Kleistip nassuerutigaa kukkusoqarneratigut Poul Schmith Naalagaaffiup eqqartuussissuserisuuneratut taakkartorneqarsimasoq.
Qanorliuna Nuna Eqqartuussissuserisut nalunaarusiaminni naliliisut?
Nuna Eqqartuussissuserisut Inatsisartut Kukkunersiuinermut ataatsimiititaliaata suluiakkiineratigut nalunaarusiaminni naliliipput Naalakkersuisut sisamariarlutik unioqqutitsisimasut. Inatsisartut Nuna Eqqartuussissuserisut arlaannaannulluunniit attuumassuteqanngitsutut naliliisinniarlugit suliakkernikuugaluaraat, Naalakkersuisut unioqqutitsisimannginnerarlutik Nuna Eqqartuussissuserisut naliliinerat Danmarkimi eqqartuussissuserisumut, Poul schmith-imut nalileqqeqqullugu tunniussimatsiaraat, Naalakkersuisut siulittaasuata suliaq Politimesterimut naliligassanngortippaa. Tamatuma kingorna Poul Schmith-ip nalunaarusiamini Nuna Eqqartuussissuserisut naliliinerat illuatungilerlugu Naalakkersuisut unioqqutitsisimannginnerarpai. Kaj Kleist-ip oqaatigaa maannakkut Politimesterip naliliinera Naalakkersuisut utaqqimaarallarniaraat, naliliinerlu taanna tiguneqartinnagu oqaaseqarnianngikkallarlutik.
