Pisortaqarfinni pisortat oqaaseqarsinnaanerat killeqarpoq
Sermitsiap nittartagaani allaaserineqarpoq, taamatut nalunaarfigineqartut allat tassaasut, Mittarfeqarfiit pisortaat aamma Misissueqqaarfiup Asiap pisortaa.
Qarasaasiami mailikkut nalunaarummi pisortanut taakkununnga nassiunneqartumi, nalunaarfigineqarput, partiinit aamma Inatsisartut ataatsimiititaliaannit kiisalu naalakkersuinermut tunngassuteqartunit saaffiginnissutit tamarmik, naalakkersuisunut ilaasortaq Jens B. Frederiksen aqqutigalugu pisalissasut.
Tamanna Naalakkersuisoqarfiup pisortaanit Steffen Ulrich-Lyngemit mailikkut nalunaarutigineqarpoq, taannalu Sermitsiap aamma pissarsiarisimavaa.
Siumup siulittaasuata Aleqa Hammondip, sapaatip akunnerani kingullermi Jens B. Frederiksen, naalakkersuinikkut nakkutilliinermik eqqussinerarlugu pisuutippaa, tassa Siumut Nukissiorfiit pisortaanut saaffiginninniaruni, naalakkersuisunut ilaasortamut saaffiginneqqaartartussanngormat.
Jens B. Frederiksenip aamma Inuit Ataqatigiit oqaaseqartartuata Juliane Henningsenip oqaatigaat, tamanna nalinginnaasunik suleriaaseqarnermut ersiutaaginnartoq. Tassa suleriaaseq tamanna suliffeqarfiit pisortaannut pingasunut atuussimassaaq.
