Pisortaqarfik: Pisassiissutit amerlassusaat piniartunit ataqqineqartariaqarpoq

- Sakkortunerpaamik erseqqissarusupparput pisassiissutit killilersorneqarnerat ataqqillugit malinneqarnissaat, Kommuneqarfik Upernavimmi qilalugartassat pisassiissutaasut 29-inik sinnerlugit pisaqartoqartalersimaneranut atatillugu taama tusagassiutinut allagaqarpoq Aalisarnermut Piniarnermut Nunalerinermullu Naalakkersuisoqarfimmi pisortaq Amalie Jessen.
oktobarip 26-at 2008 13:45

- Upernaviup kommunea oktobarip 23-iani nalunaarpoq oktobarip 22-iani qilalugartassat qaqortat 29-inik sinnerneqarsimasut. Taamatut qilalugartassanik sinniineq ukiuni tullerni Kommuneqarfik Upernavimmut pisassiissutissanit ilanngaatigineqassapput malittarisassat atuuttut killilersuinerillu malillugit, taama Amalie Jessen allappoq.

Nangipporlu:

- Naalakkersuisoqarfiup sakkortunerpaamik erseqqissarumavaa kommunit piniartullumi tamarmik, taakkualu kattuffiisa peqatigiiffiisalu Naalakkersuisut uumasunik isumalluutinik pisassiissutaasa killilersorneqarneri ataqqillugit malinneqarnissaat akisussaaqataaffigimmassuk, Amalie Jessen allappoq.

Taassuma aamma erseqqissaatigaa inatsisartut inatsisaat malillugit piniarnermik aalisarnermillu nakkutilliisut suliassaasa ilagigaat ingerlatsinermik nakkutilliisussaallutik alapernaarsuisussaallutillu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq