Pisortaq uumissorteqarlunilu kammalaaterpassualik
Nunatsinni suliffeqarfissuit annersaanni Royal Greenlandimi ukiuni tallimani pisortaareerluni Keld Askær tunuartussanngorunarpoq.
Ukiuni taakkunani Keld Askær pisortaanermini kammalaaterpassuanippoq killormullu aamma uumissorterpassuanilluni.
Ataaserli qularnanngilaq: Taama aalajangertoqarneranut ingerlatsineq pissutaagunavippoq. Keld Askærip, pisiniartitsisutut ilinniagaqartuusup, KNI-mi pisortatut issiavini qimariarlugu Royal Greenlandimi pisortanngorpoq, tassanilu pissutsit ilorraap tungaanut saatsippai.
Ukiullu affaanut naatsorsuinerup takutippaa, suliffeqarfissuaq akileraarutit peereerlugit 55 millioni koruuninik pisortap iluanaartissimagaa.
- Tamannalu kusanartuuvoq, aviisimi Børsenimi Royal Greenlandi pillugu tusagassiortoq malinnaaqqissaarsimasoq, Niels H. Carstensen, oqarpoq.
- Qanga karateeriliinermi pitsaanerpaamik angusaqarsimasunut UG miinusiisoqartarpoq, Keld Askærilu uanga isumaga malillugu taamatut angusaqarpoq. Keld Askærimi Royal Greenlandimi atorfineqqaarmat ikkuteqqaarmat suliffeqarfik aningaasanik taarsigassarsuarnik ulikkaarpoq, iluanaaruteqarpiarsinnaananilu, tamannalu tassa Keld Askærip mumisippaa, Niels H. Carstensen oqarpoq.
Inuilli tamarmik taassumatut pisortamut 50-inik ukiulimmut nersualaarinngillat. Nunatsinnimi tunisassiorfiit arlallit matunerannut taanna peqqutaasoq ilaatigut oqarniartoqartarpoq.
SIK-llu siulittaasua Jess G. Berthelsen ilaatigut oqarpoq, sinerissami SIK-mi ilaasortat arlallit taassuma taamaatittussanngorsimanera tusaramikku qissatiginngilluaasaraat.
Royal Greenlandip sulisuisa akornanni inuttut ineriartorneq, Royal Greenland Academy-mik taaneqartartoq, Keld Askærip aamma pilersippaa. Tunisassiortoqarunnaartillugu sulisut inuttut ilinniartitaanikkullu ineriartortinneqarnissaannik aqqutissiuunneqartarlutik.
Taamatuttaaq politikkerit akornanni ilaatigut aamma danskit politikkeriini Keld Askær malugineqartarpoq, ilaatigut ima oqarsimavoq:
- Paasisinnaanngilluinnarpara piumasaqaateqanngiivillusi Kalaallit Nunaannut ukiumut 3,5 milliardi koruuninik tapiisarnersi pillugu. Inuiaqatigiinnut piumasaqaatigisinnaagaluarparsi ilinniartitaaneq pingaartinneqassasoq, ikiuivallaarlusi nammineerluni iliuuseqarususseq akisussaaffimmillu tigusisinnaaneq ipitinneqartarpoq, tunniutiinnartitsisarluni minnerusutullu misigimasitsisarluni. Tamatuma kingunerisaanik inuttut ikiortariallit amerliartuinnartarput.
Keld Askæri 2003-mi januaarimi taama oqarsimavoq.
Taamanikkut oqaaserisimasai, healerisarnerup sammineqarnerujussuata nalaani oqaaserineqarmata qatangiinnarput, naalakkersuisuniillu puiguinnarneqarlutik, Siumukkullu taamanikkut pissaaneqartortaapput.
Keld Askærip tunuarnialersaarneranut peqqutaasinnaasunik suli paasisaqanngilagut. Pisortat oqarnerattut, isumaqatigiissutigisamittut tamanna pillugu aqagu aatsaat tusagassiutinut nalunaaruteqartoqassaaq.
