Pisortaq: Peqatigiiffiup kalaallit atornerluppai
Peqatigiiffik akerliussutsimik Århusip Rådhusiata silataani takutitsinissamut aggustip ulluisa 23-anni aggersaanikuuvoq, akerliussutsimik takutitsinissaq ”Kalaallit Gellerupimiit peersinneqartarnerannik” tunngaveqarnerarpaa.
-Pisoq imminnut tunngasoq saqqummersinniaannarpaat, taamaalillutillu kalaallit atorpaat. Kalaallit Nunaat kalaallilluunniit ajornartorsiutaat ilisimasaqarfiginngilluinnarpaat, Svend Kolte oqarpoq.
Svend Kolte naapertorlugu kalaallit Gellerupimi najugallit ukiuni kingullerni marlussunni ajornartorsiuteqarsimanngillat, akerliussutsimilli takutitsisoqarpat ajornartorsiuteqartoqaqqilernissaa ernummatigaa.
Nunatta Folketingimut ilaasortaatitaasa aappaata Lars-Emil Johansenip kalaallit sakkugineqarniarnerat ima nalilerusuppaa:
- Kalaaleqatitta sakkugineqarnissaat soorunami kusananngilaq. Kalaallit sullinneqarnerat pitsaanngitsutut akerliussutsimik takutitsiniat oqariartuutigissanngilaat, Folketingimut ilaasortaq, Lars-Emil Johansen, oqarpoq.