Pisortani atorfillit nakkutigineqartalissapput
USA-mi pisortani atorfillit ima naammaginninngitsiginersut imaluunniit isumalutsiginersut allaat allagaatinik allanut tunniusseriaannanngorsimallutik tarnip pissusaanik inuiaqatigiilerinermillu ilisimasallit nakkutigisalissavaat.
USA-mi nunanut allanut ministereqarfiup allagaataanik Wikileaks issakkunni kalerriussisaqattaalermat kalerriussisarnerit unitsinneqarnissaat Washingtonimi aqutsisuusut soqutigilluinnalerpaat.
Paasiniaasartullu tamanna pillugu USA-mi præsidentimut nalunaarusiorput.
Tatigisaallutik atorfeqartinneqartut pissusilersornerisa allanngorsinnaanerat nakkutigineqalissasoq atorfillillu sulinerminnut atatillugu qanoq isumagissaartiginerat paasisimasalinnit misissorneqartalissasoq nalunaarusiami innersuusssutigineqarpoq.
Nakkutiginninnerup atorfillit suliffimminnut ilumoortuunersut paasinarsisittassavaa.
Atorfillit tusagassiorfinnut attaveqartarnerat aamma nakkutigineqassaaq soraarninngorpatalu nittartakkat alakkartertagaat aamma nakkutigineqalissallutik.
Nalunaarusiaq isumannaallisaanermut attuumassuteqanngilluinnartoq malersorneqartutulli misigisimanermik takutitsineruinnartoq ilisimasalik oqarpoq. Periuserineqartoq paasiniaasartut akornanni kilitsissiaasinnaasunik ujaasinermi atorneqartarpoq ministereqarfimmilu atorfilinnik misissuinermi atugassiaanani.
Kalerriussisarnerit pinngitsoorniarnissaat pillugu nalunaarusiaq saqqummertussaanngitsoq - aammaliaasit kalerriutigineqareersimavoq Amerikamiullu nutaarsiassaqartitsiviata NBC-p nalunaarusiaq suleqatigiiginnaat atugassaat taamaaillluni avammut saqqummiuppaa.
