Pisortaasimasut akisussaassuseqanngitsumik sulisimapput

Savalimmiormiut aningaaseriaviata, Eik Bankip kukkunersiuisui pisortarisimasaalu Finansiel Stabilitetimit unnerluunneqarput. Pisortaasimasut kukkunersiuisullu aningaaseriviup ajutoorujussuarnissaa tikillugu akisussaassuseqanngitsumik sulisimanerat qulaajaanermi paasineqarpoq.
Allattoq Apollo Jeremiassen
juunip 23-at 2011 10:32

Inatsisitigut malersorneqarnissaat paasiniaanerup kingorna aalajangerneqartoq, Finansiel Stabilitetimit Ritzauimut oqaatigineqarpoq.

Eik Banki 2010-mi ukiaagaa akiliisinnaajunnaarpoq. Tamatumalu kinguneranik inatsisileritooq Carsten Fode Kromann Reumertimeersoq Finasiel Stabilitetetimit paasiniaatinneqarluni.

Aningaaseriviup pisortarisimasaa aamma kukkunersiuisut aningaaserivik innarlertussanngorlugu sullissinerliorsimasut qulaajaanermi paasineqarpoq, ilaatigut suliassanut iluanaaruteqarnissaannik ilimananngivissortunut aningaasaleeqataasarsimasut paasineqarluni.

Inatsisilerituup Fodep aningaaseriviup kukkunersiuisui pillugit ilaatigut allappoq, taakku inatsisit malillugit kukkunersiuinertik ingerlassimanngikkaat. Aningaaseriviullu avataaniit kukkunersiuisui Fodep pisuutippai, taakku inatsisit malillugit suliassaminnik sulisimannginnerarlugit.

Finansiel Stabilitetip Fode manna peqquaa aningaaseriviup politiinut suliassanngortinneqarnissa piareersassagaa aamma avataaniit kukkunersiuisut, Nota Revision taamatullu Deloitte paasiniaanermini ilanngutissagai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq