Pisortaasimasoq: Naalakkersuisut isumaqatigiissummik qimarratiginnipput

- Pisiniarfinnik ingerlatseqqinniarluta tuniniaanngilagut!” Pisiffik 2001-imi namminersortunngorsarneqarmat, Dagrofamullu tunineqarluni, naalakkersuisut taama nalunaaruteqarput. Aasiannili Pilersuisumik akikitsuutilimmik pilersitsiniarluni KNI maanna pilersaaruteqalerpoq.
Allattoq Louise M. Kleemann
aggustip 29-at 2008 07:06

Pisiffimmilu 1999-imiit 2006-ip tungaanut pisortaanerusimasup, Michael Østergaardip, taamani isumaqatigiinniaqataasup, tamanna tupigusuutigaa.

- Peqqissaartumik isumaqatigiinniarnerit nalaanni erseqqissaatigineqarpoq Dagrofa pisisutut kingusinnerusukkut imatut inissisimalissanngitsoq, Pisiffimmik unammillertussanngorluni, pisiniarfiutileqatigiiffik taanna pisortanit pigineqartillugu, Michael Østergaard Sermitsiami atuartartut allagaanni allappoq.

- Takorloorsimanngisaannarpara isumaqatigiissutip ullut arlaanni qimarratigineqarnissaa, Michael Østergaard allappoq.

Maanna – isumaqatigiissuteqarnerup kingorna ukiualunnguit qaangiuttut - illoqarfinni angisuuni Pilersuisup pisiniarfinnik ingerlatseqqilersinnaanera ammaanneqarmat, tamanna takussutissaannaanngilaq pikkorluttumik sangusaartumik ingerlatsinermut, aammattaarli Kalaallit Nunaanni Naalakkersuisunik oqartussaasunillu tatiginninnermik annikillisaataalluni.

Uppernartuussuseq nunani tamalaani pingaartinneqarpoq. Kalaallit Nunaanni Naalakkersuisut tamanna sianigisariaqarpaat, Michael Østergaard Sermitsiami atuartartut allagaanni allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq