Pisortaanissap piginnaasai ullumi nalunaarutigineqassapput

Pisortaanerunissaq sunik piginnaasaqarnersoq suliffeqarfissuup Royal Greenlandip ullumi nalunaarutigissavaa.

Pisortaaninngortussap pisinnaasai, inuttullu qanoq ittuunera, suliffissarsiortilluni piukkussanik nassaarniartartut, Headhunterinik taaneqartartut,

Royal Greenlandip pisortaanerunerata, Keld Askærip, taartissaanik nassaarniarnerminni atortussaavaat.

Siulersuisut siulitaasuata, Paaviaaraq Heilmannip, pisortaanerusunngortussap qanoq ittuujumaarnissaanik allaaserisaq ippassaq oqaaseqarfigiumanngilaa, tusagassiuutinullu ullumi nalunaaruteqartoqarnissaa innersuussutigalugu.

Suliffeqarfissuarmi Royal Greenlandimi pisortaaninngortussamik toqqaasoqarnissaata tungaanut ukiortaamiit kina taartaagallassanersoq aamma oqaatigineqarsinnaanngikkallarpoq.

Pissanngatigineqartut ilagaat Royal Greenlandimi pisortaaninngortussaq kalaallisut oqaaseqartuussanersoq, imaluunniit suliffeqarfimmik angisuumik aqutsisinnaasutut misilittagaqartumik pisortaaninngortitsisoqassanersoq.