PiSiu-meersut unnuami persuttaasarneq unitsinniarnialerpaat
Ukioq 2012-imi pinerluuteqarsimanernik politiinit nalunaarsuinerit kisitsisinngortinneqarsimaneri saqqummiunneqarmata nunatsinni pinerluutit tamarmiusuniit 15,55 procentit inunnut ulorianaatilinnik pinerluutaasimapput. Ukioq 2010-mi persuttaanerit 789i-t, 2011-mi 730-t, 2012-imilu 704-t nalunaarutigineqarsimapput, tassa inuusuttuaqqat akornanni ajortumik pisoqannginnerani paasissutissat taakku atorlugit pinaveersaartitsinissaq siunertarineqarluni.
- Siorna pinngitsaaliilluni atoqateqarniartarnermik pitsaaliunerput iluaqutaangaatsiarsimammat periuseq taanna atorlugu aalaakoorpallaartilluni persuttaasarnerit pinaveersaartinniarniarpagut. Tassa allagartaaqqat siunnersuutinik naatsuaqqanik, inuusuttuaqqanullu paasiuminartut atorlugit persuttaaqqajaasoqalersillugu qanoq iliuuseqarluni aniguisoqarsinnaanermut siunnersuutinik imaqarput, Christina Mølholm, pinerlittaalititsinermut siunnersuisoqatigiinneersoq knr.gl-imut taama oqaluttuarpoq.
Kommunit sisamaasut pitsaaliuinermut siunnersuisartui peqatigalugit allagartaaqqat siunnersuutinik imallit agguaanneqassapput, tassalu atuarfinni, sunngiffimmi orniguttarfinni, ilinniarfinni kiisalu atuakkanik atorniartarfinni allagartaaqqat siunnersuutitallit pissarsiarineqarsinnaalissallutik. Tamatuma saniatigut Politiit, Sorlak, Natteravnene kiisalu imerniartarfinnit allanilu imigassanik sassaalliisarfinni allagartaaqqat agguaanneqassapput, tassa inuusuttut sapinngisamik amerlanerpaat anguniarneqarlutik.
- Allagartaaqqat saqqummereersimalerpata qaammatip ataatsip qaangiunnerani apeqqutit immersugassat atorlugit misissuititsissaagut, oqariartuutigisimasarpullu tusaaneqarsimanersoq paasiniassallutigu. Taamaammat atuarfiit pitsaaliunitsinni neqeroorutitta uuma ilinniartitsinerminni atorluarumaaraat neriuutigaarput, tassami oqariartuuterput sapinngisatsinnik siaruaakkusoqigatsigu, Christina Mølholm nassuiaavoq.