Pisisinnaassuseq appariartippaat

Nunarsuarmi aningaasarliorneq pissutaalluni Ilinniagartuut Kattuffiat ASG ukiunut pingasunut atuuttussamik akissarsiassanut siunertarisaagaluamiit annikinnerulaartumik qaffaassutaasussamik isumaqatigiissusiorsimavoq.
Allattoq Jens Thorin
februaarip 02-at 2012 12:24

- Kalaallit Nunaata aningaasarliornera, ilami nunarsuup sinnerani aningaasarliorneq eqqarsaatigissagaanni taava immannguaq qaffaassuteqarnissaq susaarnermiit pitsaaneruvoq. Katrine Ødegaard, Ilinniagartuut Kattuffiani siulittaasuusoq taama oqarpoq.

Ilinniagartuut tassaapput tjenestemandit, ilinniagartuut tjenestemanditut atorfillit, ilinniarnertuunngorniarfinni ilinniartitsisut, kiisalu Namminersorlutik Oqartussani Kommuninilu aqutsisutut atorfillit. Taakku ukiuni pingasuni katillugit procentinik pingasunik akissarsiatigut qaffaavigineqarnissartik akuersaarsimavaat.

- Taama annikitsigisumik qaffaavigineqarnissaq akuersaaruminaakkaluaqaaq, tassami ilaasortatta pisisinnaassusaat appariartussaassammat, sualummik ukiut marluk - pingasulluunniit qaangiuppata, Katrine Ødegaard tusagassiuutinut nalunaarusiami taama allappoq.

Isumaqatigiissutip ajunngittorsiassaqarnera ilaasortat akuersaarnerinut pissutaasoq Katrine Ødegaardip oqaatigaa.

Ilaatigut palasit akissarsiaasa qaffannissaat atorfininnerannullu atatillugu pitsanngoriaatissat aamma allaffeqarfinni qullersat suliartoqqusaanissamut pisussaaffiisa annikillineqarnissaat akuersaarnermut tunuliaqutaapput.

- ASG sinnerlugu isumaqatigiissusiassami siunertat ataqqillutigit isumaqatigiinniaqataavugut, naak sulititsisut akissarsiassanik qaffaavallaannginnissaq piumasarisimagaluaraat. Taamaariarmat akisussaaffeqarpalaarluta isumatigiinniarnissarput siunniussimasimavarput, Katrine Ødegaard taama oqaluttuarpoq Namminersorlutillu Oqartussat isumaqatigiinniartaasaat tupaallaatigisimanarpaa.

- Isumaqatigiinniariartortummi takkutilertaraat inernileereerlutik nikiseriagassaajunnaareerlutillu. Katrine Ødegaard taama naggasiivoq.