Pisisa.gl akissarsisitinneqanngilaq
Kisianni internetikkut pisiniarfik pitsaanerit tallimat akornanniippoq, nittartakkalu atuutilerneraniit ukioq ataasinngortorsiulermat pisiniarfikkut pisiassat tamarmik 10 procentimik akikillilerneqarput.
- Peqataanerput pisisartuvut sinnerlugit tulluusimaarutigaarput, uppernarsarmassuk, Kalaallit Nunaanni tamarmi nittartakkatigut sukkasuumik pisiniarsinnaaneq pisariaqartinneqartoq. Aallartinneraniit ukioq ataasinngortorsiorneq sapaatip-akunnerani maajip aallaqqaataani aallartittumi pisussaammat maajip aallaqqaataaniit arfineq-pingajuata tungaanut nittartakkakkut tuniniakkat tamaasa 10 procentimik akikilliiviginiarpavut, pisortaa Marcus Probst oqarpoq.
Nittartakkakkut pisiniarfiup pisortaa naapertorlugu piumaneqarnerpaasarput, qerititsiviit, nillataartitsiviit, errorsiviit, tunisassiat elektroniskiusut, pinngussat angallatillu motoorii.
Nittartakkakkut pisiniarnerpaasimasut qulit sumiuunerinik misissuinermi paasineqarsimavoq kitaata avannaaniittumi Qaarsuneersut periarfissamik taassuminnga atuinerpaasimasut.
