Pisinnaatitaaffitit pillugit erinarsorit

Meeqqat pisinnaatitaaffii pillugit sullissivia MIO ualisoq ullut arlaanni perorsaasunngorniarlutik ilinniartunit marlunnit, Uiloq Nielsen aamma Susanne J. Nielsenimit nipilersortartumillu Peter Motzfeldtimit saaffigineqarput. Pingasuullutik siunertaqarput, tassalu perorsaasunngorniat pineqartut soraarummeerutissatut suliaat erinarsuutitut saqqummersinniaramikku. Uiloq Susannelu meeqqat pisinnaatitaaffii pillugit allaaserisaqarnerminnut atatillugu siusinnerusukkut Meeqqat Illersuisuat Aaja Chemnitz Larsen attavigereersimavaat MIO-p meeqqat pisinnaatitaaffii pillugit suliaanik paasisaqarusullutik.

Nipilersortartup Peter Motzfeldtip inuusuttuaqqat peqatigalugit kingusinnerusukkut allaaserisaq erinarsuutinngortippaat.

- Angut inuusuttunnguaq 17-inik ukiulik erinniortissimavarput, taavalu meeqaat inuusuttullu peqatigalugit erinarsuut immiupparput. Inernera tusarakku eqqarsarpunga kikkut tamarmik tusartariaqaraat. Taamaattumik MIO attavigisimavarput, taakkumi meeqqat pisinnaatitaaffiinik suliaqartuupput. Isumaqaratta MIO-p suliaanut tapersersuutaasinnaasumik erinarsuusiorsimalluta, Peter Motzfeldt oqarpoq.

MIO-p inuiaqatigiinni meeqqat pisinnaatitaaffii pillugit siaruarterinissaq sulissutigaa. Tassalu meeqqat tamarmik pisinnaatitaaffimminnik ilisimasaqarnissaat suliassaata ilagaat. Meeqqallu Illersuisuat Aaja Chemnitz Larsen qularsimanngilaq:

- Erinarsuut pitsaangaarmat imaalu pisuujungaarmat saqqummersinneqarnissaanut suleqatigiinnissamut akuersaarsimavunga, nangillunilu:

- Nipilersornerup inuit akornanni pissutsit inuppalaartunngorlugit annittarpai, ingammillu uani meeqqat nipaasa eqqortinnartumik ajunngitsumik isumaqalersippai.

Kingorna ataatsimoorlutik suliffeqarfiit aningaasaateqarfiillu saqqummersitsinissap aningaasartuutissaanut matussutissaanik qinnuteqarfigaat. Erinarsuutip saqqummersinneqarnera Bank Nordikimit, Grønlandsbankenimit, Kalaallit forsikring/IF-imit Lions Club Nuuk-mit taperneqarpoq, Nuuk TV-llu immiussinermi atortut akeqanngitsumik atukkiussimavai, CB-reklamellu ilusilersuineq isumagalugu.

- Aningaasaliisut MIO-llu tapersersorsimanngikkaluarpatigut suliarput naammassisimanavianngikkaluarparput, taamaattumik nuannaarutigeqaarput taamak amerlatigisut isumassarsiatsinnik tapersorsimammatigut”, Peter Motzfeldt oqarpoq.

Erinarsuut 1. juni 2013-imiit akeqanngitsumik MIO-p facebookiatigut nittartakkakkullu qupperneratigut www.mio.glaaneqarsinnaavoq. Erinarsuut kingusinnerusukkut cd-nngorlugu musikvideoumut ilanngullugu saqqummersinneqarumaarpoq.

Attavigisassaq: Peter Motzfeldt, mobil 258591 imaluunniit Aaja Chemnitz Larsen, aaja@mio.gl.